KHEREBAI MASAMWNGNO LAGWI KOK-KISA Tripura dophani Kherebai Masamwng sirisiti siming masajagwi phaimani kaisa kacham masam...
KHEREBAI MASAMWNGNO LAGWI KOK-KISA
Tripura dophani Kherebai Masamwng sirisiti siming masajagwi phaimani kaisa
kacham masamwng. Kerebai buisuni jora ebakhlai Bisiktal lamjogmwng jora
masajago. Jabwi jabwini jora bodol bodol cherai khonai okra chakra mililaiywi
pra pra nukbwi nukbwi hohom- dodomkhe masalaigo. Kherebai masamwng daijo
masajanai masamwng. Kherebai masathani 22 tal tongwk iborok ongkha-
Kholaphalmung, Tula kokmani, Ri Takmani, Ri sumani, Tokla tanlaimani, Dailo
kolmani,Al chuaimani, Nagui lepmani, Suila maikathrumani,Bong boraima
birmani,Nagui birmani,Miphuma khusumui khurmani, kuicha sumani, Haping
beraimani, Brwi sungmani, Thila gerokmani,Ratha somani , Tote kelengbuphang
sukmani, Lushi khulmani, Gabing bomani aro onjala Balmani , aborokno daijokhe
masathai nangwk. Kaisa tal krokhai masamwng chaya ongthango.
Baksa baksa kherebai masamwngno “Goriya Masamwng” hinywibo
salaima nujago. Abo thikya twmwi hinba
buisu bai goriya baswk krwngmwng tong abo gamkhe sigwi takbo lamayakhu, buisu
bai goriya krwngmwngno lagwi uansukrwng suikrwng shyamacharan Tripura
salangmani kok kaisa tongwk,abo ongkhade – “Buisu
is something which goriya is anotherthing” hinywi salangkha. Iro sathai
klaiwk Masamwngni bwmwng tongywi tongwk “Kherebai” hinkhai aro tmani bwmwng
kothebai sanani nang?, abo Tripura
dophani bwmwngno kwmwkronani naima klaigo. Kothe dophani masamwng bwmwng krwi ongywi mago mato Tripura
dophani bwmwng tongwk “Kherebai”.
Tripura dophani masamwng “Kherebai masamwng” simingya bini badebo tongwk –
Bottle masamwng, Kharga masamwng , Anjola masamwng , Tangbiti etc.
Dophani sinimwng beni biskango tisani thangthani Kokrabai
bai siming tisamiya kokrabaini loge masamwng -musuimwng nangwk. Modernization jora tak, Chorok dophani
lukurok pailaiya holaiya dophano jorabai baksa rwngywi tisathani. Tripura
dophani sijak nujak lukurok yapri sethai dophano tisathani. Tripura dophani
kherebai masamwng bari kacham masamwngse mato takbo jeswk gamkhe sinimwng
mathai mayakhu. Cherairokni bising tlwk tlwk kwmwkmahaise ongkha, masana
siliya,” kherebai" onglaimani
nujagwi tongwk. Tripura dophani masamwngrokno rwngywi mwthangywi larwkthai
chwng Chorokni. Abose Chini Dophani sinimwng kaisa.
Kherebai
masamwngno tisana thangthani tma tma khlaina nang:
1.Poila kherebai masana krwngrok pra pra cherai bodol khagwi
phwrwngni nangnai. Tmani hinba cheraini siming phwrwngywi twbwimiyakhe ulo gara
ongywi yaphang yarwng sukhomiya ongnai
2. Kherebai masamwngno lagwi ma salainai, takni cherairokno
ma sironai. Takni cherairokse dophani thinang.
3. Cherairokno Kok aro masamwng musuimwngrokno hamjakna ma
phwrwngnai.
4.Music collegehai jega rogo “Kherebai” masamwngno
phwrwngronani ma saktharnai. Lebang, mamita, hojagiri phwrwngjago “Kherebai”
khe tmani phwrwngjaya, bono jaikhlai naiywi naina nangthai.
5. School activities rogo kherebai masamwng, subject khlai
dasongni nangnai.
6. Moyal khobywi dance acedamy haikhe -kherebai academy
khlai moyal bai moyal bataimwngrok khlaini nangthai.
Takni bak iswk jorano
sasino, khulungka.
Tripura dopha ayok lokthung, kwchwng kathar ongywi Hayongo
sinijakthung.
Hambai.
Suikha - Sarup Tripura
